कर्णाली प्रदेशका मुख्यमन्त्री यामलाल कँडेलले दशौँ राष्ट्रिय खेलकुद प्रतियोगिताको मिति नसार्न राष्ट्रिय खेलकुद परिषद्लाई आग्रह गरेका छन् । दशौँ राष्ट्रिय खेलकुद प्रतियोगिता मूल आयोजक समितिकोको मंगलबार बसेको बैठकमा कँडेलले पटक–पटक मिति सार्ने कामले प्रतियोगितालाई अन्यौल बनाएको बताएका हुन् । यस्तो गतिविधिले जनविश्वास गुम्ने हुँदा अब मिति सार्ने काम नगर्न खेलकुद परिषद्लाई कँडेलले आग्रह गरे ।
राष्ट्रिय खेलकुद परिषद्ले दशौँ राष्ट्रिय खेलकुद प्रतियोगिता जेठ २ देखि १० सम्मको मिति तय गरेको छ । पटकपटक मिति सरेपछि कँडेलले अब जेठभन्दा पर जान नसकिने धारणा राखे ।
‘अहिलेको प्रस्तावित मिति त्यति अनुकूल होइन तर त्योभन्दा पर जान सक्ने स्थिति छैन,’ उनले भने, ‘अविश्वासिलो बन्ने परिस्थिति म देख्छु ।’
प्रदेश सरकारले राष्ट्रिय खेलकुद प्रतियोगिताको लागि रंगशाला लगायतका कामहरूलाई पहिलेदेखि नै तीव्र गतिमा अगाडि बढाइरहेको उल्लेख गर्दै कँडेलले प्रतियोगिता सफल पार्न प्रदेश सरकारले आफ्नो जिम्मेवारी पुरा गर्ने बताए । उनले भने, ‘यो प्रतियोगिताको मुख्य आयोजक संघीय सरकार भएकाले तपाईँहरूले ढंग पुर्याउनुहोला, हामी सहआयोजक भएको नाताले हामीलाई तोकिएको जिम्मेवारी हामीले पुरा गछौँ ।’ प्रतियोगिताको लागि निर्देशिका बनाउने कुरामा खेलकुद मन्त्रालयले प्रदेशसँग समन्वय नगरेको उनले बताए ।
