१ फागुन, बुटवल । नेकपा ओली समूहका नेताहरुले केपी शर्मा ओलीलाई अझै एक कार्यकाल प्रधानमन्त्री र पार्टी अध्यक्षका रुपका रुपमा अगाडि सारेको छ ।
पुस ५ गते प्रतिनिधि सभा विघटनसँगै विभाजित नेकपाको प्रचण्ड-माधव समूह सडक आन्दोलनमा छ भने सत्तामा रहेको ओली समूहले पनि सभाहरु गरेर शक्ति प्रदर्शन गर्दै आएको छ । माघ २३ मा काठमाडौंमा सभा गरेको यो समूहले शनिबार बलियो पकड मानिएको लुम्बिनी प्रदेशको बुटवललाई शक्ति प्रदर्शन गरेको छ ।
बुटवल-७ सिद्धेश्वर माविको मैदानमा भएको सभाका लाागि प्रदेशका १२ वटै जिल्लाबाट कार्यकर्ता र जनता ल्याइएको थियो । सभालाई सम्बोधन गर्दै समूहका अध्यक्ष एवं प्रधानमन्त्री केपी शर्मा ओली, महासचिव एवं अर्थमन्त्री विष्णु पौडेल, उर्जामन्त्री टोपबहादुर रायमाझी र उद्योगमन्त्री लेखराज भट्ट, मुख्यमन्त्री शंकर पोखरेलले राजनीतिकसँगै विषयका मुद्दा समेत अगाडि सारे ।
आफूहरु विकास र समृद्धिको पक्षमा रहेको, तर प्रचण्ड-माधव पक्षले विकास देख्न नसकेर कामै गर्न नदिएको र अस्थिरता निम्त्याएको आरोप लगाए । पार्टीको आधिकारिकता र चुनाव चिन्ह आफूहरुले नै पाउने जिकिर गर्दै नेताहरुले अलमलमा नपर्न र चुनावको तयारीमा जुट्न आग्रह पनि गरे ।
सभाको उपस्थिति देखेर हौसिएका प्रधानमन्त्री केपी शर्मा ओलीले भाषणको शुरुमै अर्को समूहलाई सभा हेर्न आउन निम्ता दिए । ‘तीन दिन अगाडिमात्रै देशभरिबाट केही मान्छे जम्मा गरेर मलाई जनसभा हेर्न आउ भनेका थिए’ प्रचण्ड-माधव समूहलाई इंगित गर्दै ओलीले भने, ‘देशभरिको होइन, लुम्बिनी प्रदेशका मात्रै जनता आएका छन्,जनसभा कस्तो हुन्छ हेर्न बुटवल आउनुस् ।’
त्यसपछि सम्बोधनको अधिकांश समय विकास निर्माणका कामका कुरा गरे । देशलाई स्थिरता र विकासको दिशामा अघि बढाउन तीन वर्ष अगाडि माओवादी केन्द्रसँग एकता गरेको, तर अर्को पक्ष देशको विकास हैन, आफू बलियो, गुट बलियो बनाउनतिर लागेकाले अहिलेको अवस्था आएको ओलीले बताए ।
अहिले पार्टी फुटेको नभई अस्थिरता चाहनेहरु बाहिरिएको भन्दै उनले भने, ‘गएको तीन वर्ष यस्ता आमसभा गर्न सक्ने थिएनौं, खुट्टा तान्नेहरु थिए, टेलिभिजन, रेडियोमा मनपरी बोल्दै हिँडे । ‘सरकारले गरेका राम्रा कामको प्रशंसा गर्नुभयो ? कहिल्यै, गर्नुभएन । बुटवल-नारायणगढ सडक, भैरहवा विमानस्थल, भेरी बबई डाइभर्सन, लुम्बिनीमा पांच हजार जना क्षमताको सभा हल सबैले देखेका छन्, तर उहाँहरु देख्नुहुन्न, भन्न सक्नुहुन्न, स्वीकार गर्ने हिम्मत छैन ।’
सिद्धार्थ राजमार्ग दुई लेन, कालीगण्डकी कोरिडोर, हुलाकी राजमार्ग, कृषि आधुनिकीकरण, लुम्बिनी गुरुयोजना, रामग्राम गुरुयोजना, सबैतिर विकास गरिरहेको ओलीले फेहरिस्त सुनाए । नौमुरे, कालीगण्डकी र माडी डाइभर्सनबाट सिंचाई गर्ने काम अघि बढेको, शिक्षा, स्वास्थ्य लगायत क्षेत्रमा विकासका लहर आएका उनले बताए । देश सुरुङ युगमा प्रवेश गरेको र काठमाडौं-नौबिसे, सिद्धबाबा सुरुङ बन्ने क्रममा रहेको ओलीले सुनाए ।
‘देशमा विकास, सुशासन भ्रष्टाचारी अपराधीलाई कारवाही हुनुपर्छ, हामी त्यो पक्षमा छौं’ उनले भने, ‘कसलाई भोकले मार्न दिन्नौं लामखुट्टेले टोकेर मर्न दिंदैनौं ।’ मृत्युदर घटेको र यो सरकारको ठूलो सफता भएको समेत उनले बताए । फागुन ३ गते सिंहदरबारबाट तीन वर्षमा भएका कामको जानकारी दिने भन्दै उनले भने, ‘विरोधीहरु त्यतिकै छट्पटाएका होइनन् । अरु डेढ दुई वर्ष सरकार चल्यो भने अरुका बाकस रित्तै हुन्छन्, नेकपाको मात्रै भरिन्छ भनेर डराएका हुन् ।’
उनले संसद विघटन संविधानसम्मत जिकिर गरे । ‘काम गर्न नदिएपछि वहुमतको प्रधानमन्त्रीको हिसाबले विघटन गर्नुपर्यो, संविधानको ७६ -१) अनुसार बनेको सरकारले उपधारा ७ र ८५ अनुसार विशेषाधिकार प्रयोग गरेर विघटन गरेँ’ उनले भने ।
