भारत हुँदै महिलाहरूलाई रोजगारीका लागी तेस्रो मुलुक पठाउने गिरोह सक्रिय भए संगै नेपालगन्ज सिमानाका भएर भारत हुँदै तेस्रो मुलुक जाने महिला तथा युवतिहरुको संख्यामा वृद्धि भएको पाइएको छ ।
शान्ती पुनःस्थापना गृह शाखा कार्यालय नेपालगन्ज २०७७ असोज १ गते नेपालगन्जमा स्थापना भएको हो । स्थापनाकाल देखि हालसम्म श्रावण महिनासम्म ३ हजार ३ सय बढीलाई परामर्श प्रदान गरेको छ भने ५ जना बिरुद्ध मानवबेचबिखन बिरुद्ध मुद्दा दर्ता गरेको छ ।
त्यस्तै नेपालगन्ज सिमानाकाबाट मात्रै १६६ जनाको उद्दार गरेको शान्ति पुनःस्थापना गृह नेपालगन्जका सुपरभाइजर डोलमाया गुरुङले बताउनुभयो ।
नेपालबाट दैनिक रुपमा भारत जाने युवती तथा बालबालिका नेपालगन्ज नाका भएर भारत तथा तेस्रो मुलुक बेचबिखन हुनसक्ने सम्भावनालाई रोक्न नाकामा सादा पोशाक समेत परामर्शदाता खटिने गरेको र दैनिक रुपमा परामर्श दिने गरेको तथा महिनामा सरदर ३०/३२ वटा केशहरु आउने सुपरभाइजर गुरुङले बताउनुभयो ।
शान्ती पुनःस्थापना गृह नेपालगन्जले बाँकेको नेपालगन्ज – जमुनहा सिमानाका बाहेक नरैनापुरको सुईया नाका, डुडुवा गाउँपालिकाको खडैचा नाका र जानकी गाउँपालिकाको बढैया सिमानाकामा समेत एक एक जना परामर्शदाता राखी आफ्नो उपस्थिति जनाउदै मानव बेचबिखन बिरुद्ध आफ्नो अभियान संचालन गर्दै आएको गुरुङले बताउनुभयो ।
शान्ती पुनःस्थापना गृह नेपालगन्जले भारतको विभिन्न संघ संस्था संगको सहकार्यमा भारतको विभिन्न शहरमा श्रम शोषणमा परेका बालबालिका तथा महिलाहरुको समेत उद्दार गर्दै आएको छ । गृहले भारतको उन्नाउ भन्ने स्थानबाट बर्दियाका १ र कैलालिका ३ जना बालबालिकाको उद्दार गरेको पुनस्थापना गृहका परामर्शदाता सावित्रा पुनले बताउनुभयो ।
उनिहरु करिब ६/७ महिना देखि श्रम शोषणमा परेको सुचना पछि हामिले भारतको प्रहरी र सामाजिक क्षेत्रमा कार्य गर्दै आएका केही संघ संस्थाहरु संग समन्वय गरेर उनिहरुको उद्दार गर्न सफल भयौ ।
तर भारतबाट उद्दार गर्न भने त्यति सहज छैन । नेपालमा जस्तो प्रहरी प्रशासन तथा अन्य संघ संस्था संगको जस्तो समन्वय कायम गर्न सहज छैन तै पनि हामिले त्यस्ता उजुरी वा सुचना पाए सम्म प्रयास गर्दै आएका छौं ।
पुनःस्थापना गृहका परामर्शदाता पुनले बताउनुभयो । नेपालको विभिन्न जिल्ला अझ बिशेषगरि पुर्वी नेपालका पहाडी जिल्लाबाट नेपालगन्ज सिमानाका भएर मानव बेचबिखनको कार्य हुँदै आएको खुलेको छ ।
अन्य जिल्लाबाट काठमाडौं र काठमाडौंबाट नेपालगन्ज ल्याएर नेपालगन्जबाट सिमा पार गर्ने घटना धेरै रहेको परामर्शदाता कमला थापाले बताउनुभयो ।
अन्य जिल्लाबाट युवतीहरु नेपालगन्ज ल्याएर नेपालगन्जमा केही हप्ता सम्म राखेर, नेपालगन्जका स्थानिय ठाउँ, बोलचाली र रहनसहनमा भिजाउने गरेको पाइयो थापाले बताउनुभयो ।
नेपालगन्ज वा आसपासका स्थानियहरु साधारणरुपमा किनमेलको लागि सिमापारी जाने भएको त्यस्तोमा सुरक्षाकर्मी तथा मानव बेचबिखनको बिरुद्ध कार्य गर्ने संघ संस्थाको आँखा छल्नको लागी स्थानिय भेषभुषा तथा रहनसहन र लामो यात्राको आभास हुने खालको कुनै पनि गतिविधि नगरेरै नाका पार हुने गरेको छन् ।
जसको लागि नेपालगन्जमा केही दिन राखेर घुमाउने र स्थानिय जस्तै बनाउने गरेको बताउछन् थापा । यता नेपालगन्ज भएर भारतिय सिमावर्ती बजार रुपईडिहा पुराए बापत प्रतिब्यक्ती १० हजारसम्म लिने गरेको खुलेको छ ।
